La pensiun Fontana sur Passugg vegn erigida la fin dal 19avel tschientaner. La chasa è plazzada, sco radund in tozzel pensiuns e hotels sumegliants, en la vischinanza da la famusa chasa da cura Passugg. Durant decennis è la pensiun Fontana in hotel da cura stimà.
Dorothea Brüesch, la davosa ertavla, ha disponì il 1983 tras testament che l'hotel duaja vegnir tratg a niz en il futur da persunas senza udida e da persunas cun impediment d'udida. Durant nov onns è l'immobiglia cun tut ils edifizis en possess da l'Uniun per ils surdmits e flaivels d'udida dal Grischun. Il 1993 vegn la proprietad surpigliada da l'Associaziun Fontana Passugg, fundada il medem onn, cun il scopo da mantegnair la chasa per la cuminanza d'umans senza udida e d'umans cun impediment d'udida.
Persunas senza udida, persunas cun udida reducida e persunas che han pers l'udida ensemen cun persunas cun udida cumplaina, realiseschan en in project d'autoagid remartgabel lur visiun d'ina chasa da furmaziun e da cultura. Per 10'000 persunas senza udida, 700'000 persunas cun impediment d'udida e 3'000 persunas che han pers l'udida resulta in center d'inscunter e da furmaziun fitg apprezià. Ils curs han en mira la furmaziun supplementara, els promovan però era cleramain il sentiment da cuminanza tranter persunas senza udida, persunas cun impediment d'udida e persunas cun udida cumplaina.